“Lion Heart” එළිදකී.. කාන්තාවන්ට⁣ වෙන්වූ Ladies කුරුඳු සිගරැට්ටුවකුත් එයි… දැන් වෙළඳපලේ…

199

දුම්කොළ සහ මද්‍යසාර පිළිබඳ ජාතික අධිකාරියේ දැඩි විරෝධතාවය මධ්‍යයේ කර්මාන්ත අමාත්‍ය විමල් වීරවංශ මහතාගේ අනුග්‍රහයෙන් කුරුඳු සිගරැට්ටුව (17) කොළඹදී එළිදක්වන ලදී.

මෙම කුරුඳු සිගරැට්ටුව නිර්මාණය කළ නේචර්ස් සමූහ ව්‍යාපාරයේ සභාපති,දේශබන්දු සමන්ත පුංචිහේවා මහතා වි⁣ශේෂ සාකච්ඡාවකට එක් වෙමින් සඳහන් කළේ මෙම නිෂ්පාදනය ප්‍රචලිත කිරීම සඳහා වර්තමාන රජයෙන් තමන්ට පූර්ණ අනුග්‍රාහය තිබෙන බවයි.

එසේම,කාන්තාවන් වෙනුවෙන් වෙනමම Ladies කුරුඳු සිගරැට්ටුවක් හඳුන්වා දී තිබෙන බවද හෙතෙම කීය.

ශ්‍රී ලාංකික කුරුඳුවලින් නිෂ්පාදිත ආයුර්වේද ධූමපාන (කුරුඳු සිගරැට්ටුව) මෙරට නිෂ්පාදන ක්ෂේත්‍රයේ යෝධ පිම්මක් තබනු ඇතැයි කර්මාන්ත අමාත්‍ය විමල් වීරවංශ මහතා පවසයි.සියයට සියයක් ශ්‍රී ලාංකීය කුරුදුවලින් නිෂ්පාදනය කළ Lion Heart ලෙස නම් කර ඇති ආයුර්වේද ධූමපාන නිපැයුම්කරු වන්නේ සමන්ත පුංචිහේවා මහතා ය.

මෙරට අමුද්‍රව්‍ය මත පදනම් වූ මේ ධූමපාන තදින් දුම්පානයට ඇබ්බැහි වූ අයෙකුට ඉන් මිදිය හැකි ආදේශයක් බව ද ඇමැතිවරයා පවසයි.කොළඹ කිංග්ස්බරි හෝටලයේදී අද(17) පැවති මෙම ආයුර්වේද ධූමපාන ජනගත කිරීමේ අවස්ථාවට එක්වෙමින් අමාත්‍යවරයා මේ බව පැවසීය.

බහුජාතික සමාගම්වල අනුදැනුම හා මෙහෙයවීම මත සමහර රජයේ ආයතන මේ නව නිපැයුමට “බාල්දි පෙරළීමට” බලා සිටින බව පවසන අමාත්‍යවරයා අවධාරණය කළේ නීති පොතේ කුමන වගන්ති පැවතියද නව නිෂ්පාදනකරුවෙකගේ නිෂ්පාදන ඉදිරියට ගෙන යාමට කර්මාන්ත ඇමැතිවරයා ලෙස තමන් කැප වන බව ය

කුරුඳුවලින් නිෂ්පාදිත ආයුර්වේද ධූමපාන නිෂ්පාදන ක්ෂේත්‍රයේ හැරවුම් ලක්ෂයක් බව ද අමාත්‍යවරයා වැඩිදුරටත් පවසයි.ලංකාවේ නීති පද්ධතිය සකස් වී ඇත්තේ නව නිපයුම්කරුවන් ඉදිරියට ගෙන යාමට නොව හිරේ දැමීමට නිසා නීතිය වෙනස් කොට නව නිපැයුම්කරුවන් දෙස සාධාරණව බැලිය යුතු බව ද අමාත්‍යවරයා පවසයි.