ශ්‍රී ලංකාව සමඟ පැවති පළමු ටෙස්ට් තරගය තියුණු සටනකින් අනතුරුව කඩුලු 02ක ජයක් හිමිකර ගන්නට සත්කාරක නවසීලන්ත පිළට අද (13) හැකියාව ලැබුණා.
නවසීලන්තය ඉදිරියේ ලද මෙම ගෞරවාන්විත පරාජයත් සමඟ ටෙස්ට් ලෝක ශූරතාවලියේ අවසන් මහා තරඟයට පිවිසීමට තිබූ බලාපොරොත්තුව ශ්‍රී ලංකාවෙන් ගිලිහී ගියා.
ක්‍රයිස්ට්චර්ච් හි හැග්ලි ඕවල් ක්‍රීඩාංගනයේ දී පසුගිය 09 වනදා ආරම්භ වූ මෙම තරගයේ පළමුව පන්දුවට පහරදුන් ශ්‍රී ලංකා කණ්ඩායම සිය පළමු ඉනිම වෙනුවෙන් සියල්ලන් දැවී ලකුණු 355ක් රැස් කිරීමට සමත් වුණා.
ඊට පිළිතුරු ලෙස සිය පළමු ඉනිම ක්‍රීඩාකළ නවසීලන්තය ලකුණු 373ක් පළමු ඉනිමේ ලකුණු පුවරුවට එක් කළා.
නවසීලන්ත පළමු ඉනිමට වඩා ලකුණු 18ක් පිටුපසින් සිටිමින් සිය දෙවන ඉනිම ආරම්භ කළ ශ්‍රී ලංකා කණ්ඩායම සියල්ල දැවී ලකුණු 302ක් රැස් කිරීමට සමත් වුණා.
ඒ, අනුව මෙම තරගයේ ජයග්‍රහණය වෙනුවෙන් සත්කාරක නවසීලන්තයට හිමි වූ ඉලක්කය ලකුණු 285ක්.
එම ඉලක්කය හඹා යාමට පිටියට පිවිසි නවසීලන්ත ක්‍රීඩකයින්ට තරගයේ අවසන් දිනය වූ අද දිනයේ වර්ෂාවෙන් බාධා එල්ල වුණා.
ඒ, හේතුවෙන් තරගය ආරම්භ කෙරුනේ එරට වේලාවෙන් පස්වරු 3.30ටයි.
ප්‍රමාද වී තරගය ආරම්භ කිරීම හේතුවෙන් අවසන් දිනය වූ අද දිනයේ තරගය පන්දුවාර 52ක සීමා කරන්නට සිදු වුණා.
එසේ තිබිය දී අවසන් දිනය වූ අද (13) දිනයේ කේන් විලියම්සන් සහ ඩැරල් මිචෙල් සිව්වන කඩුල්ලට සාර්ථක සම්බන්ධතාවක් ගොඩනඟමින් නවසීලන්තය ජයග්‍රහණය කරා රැගෙන ගියා.
එහිදී කේන් විලියම්සන් නොදැවී ලකුණු 121ක් සහ ඩැරල් මිචෙල් ලකණු 81ක් බැඟින් රැස් කළා.