සරසවි සිසුන්ගේ බැංකු ගිණුම් පාතාල සල්ලි වලට සම්බන්ධ වූ හැටි හෙළිවෙයි

233

පාතාලය සහ කුඩු ජාවාරම්කරුවන්ගේ වත්කම් දේපළ හා බැංකු ගිණුම් පරික්ෂා කිරීමේ මෙහෙයුම් ආරම්භ වීමත් සමඟ ඇතැම් ප්‍රබල කුඩු ජාවාරම්කරුවන් ඔවුන් එම ජාවාරමෙන් උපයාගෙන ඇති විශාල මුදල් බැර කර ඇති බැංකු ගිණුම් සහ මුදල් විශ්වවිද්‍යාල සිසුන් සහ සාමාන්‍ය ජනතාවගේ ගිණුම් වෙත බැර කිරීමේ ක්‍රියාවලියක් සිදුවෙමින් පවතින බවට බස්නාහිර පළාත් භාර ජේ‍යෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා පැවසුවා.

ඇතැම් විශ්වවිද්‍යාල සිසුන් නොදැනුවත්කම නිසා මොවුන්ගේ උපායවලට හසු වී ඇති බවත් ඊට අදාළව පැමිණිලිද පොලිසිය වෙත ලැබී ඇති බවද ඔහු සඳහන් කළා.

ජාවාරම්වලින් උපයා ගත් එම විශාල ගිණුම් පවත්වාගෙන යෑම සඳහා විශ්වවිද්‍යාල සිසුන්ට හා සාමාන්‍ය ජනයාට පාතාල නායකයන් 5,000ක් වැනි මුදලක් සතිපතා ගෙවන බවද හෙළිදරව් වී ඇති බවද ඒ මහතා සඳහන් කළා.

එම ගිණුම්වලට විශාල මුදල් කන්දරාවක් පාතාලය විසින් බැර කර පසුව ඊසි කෑෂ් හරහා ඔවුන් ලබා දෙන අංකයට බැර කරන ලෙසට දන්වන බවද හෙළිව තිබෙනවා.

ජේ‍යෂ්ඨ නියෝජ්‍ය පොලිස්පතිවරයා මේ බව සඳහන් කළේ පොලිස් මූලස්ථානයේ ඊයේ (19දා) පැවැති මාධ්‍ය හමුවකට එක් වෙමින්.
NewsWire