දරුවන් ගැන නොසිතුවොත් දරුවන් අතර කොවිඩ් පොකුරු ඇතිවිය හැකි බවට අනතුරු ඇඟවීමක්

209

පාසල් ආරම්භ කිරීම පිළිබඳ තීරණය ගැනීමට පෙර වයස අවුරුදු 12ට වැඩි පාසල් දරුවන් සඳහා කොවිඩ් මර්දන එන්නත ලබා දීමට කටයුතු කළ යුතු බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පවසයි.

ඔහු සඳහන් කළේ, පාසල් දරුවන්ට කොවිඩ් මර්දන එන්නත ලබා දීමට කටයුතු නොකළහොත් දැනට සමාජයේ ආසාදිතයන් ව්‍යාප්ත වී ඇති ආකාරයට දරුවන් අතරේ ද පොකුරු වර්ධනය වීමේ හැකියාවක් පවතින බවය.

මේ වන විට ලෝකයේ බෙහෝ රටවල් වයස අවරුදු 12ට වැඩි ළමුන් සඳහා එන්නත් ලබා දෙමින් සිටින බව උපුල් රෝහණ මහතා මෙහිදී සඳහන් කළේය. 

ඔහු ප්‍රකා‍ශ ක‍ළේ, එන්නත් ලබා දීම, එන්නත් බෙදාහැරීම සහ ප්‍රමුඛතාව හඳුනා ගැනීමේ ක්‍රමවේදය පිළිබඳව බිම් මට්ටමේ සිටින මහජනතාව ප්‍රශ්න කරන බවය.

එමෙන් ම, පාසල් දරුවන්ට ප්‍රමුඛතාව ලබා නොදීම සහ 60ට වැඩි පිරිසට මුලින් ප්‍රමුඛතාව ලබා නොදීම පිළිබඳව මහජනතාව දැඩි ලෙස අප්‍රසාදය පළ කරන බව ද ඒ මහතා වැඩිදුරටත් සඳහන් කළේය.

“අපි කාරුණිකව ඉල්ලනවා. පාසල් ආරම්භ කරනවා නම් පාසල් ආරම්භ කරන්න කලින් අනිවාර්යයෙන් ම දරුවන්ට සුදුසු එන්නතක් ලබා දීම අත්‍යවශ්‍ය කාරණයක් කියලා.”