කොවිඩ් මර්දන එන්නත නිසා ලිංගික ශක්තිය හීන වෙනවා ද?

262

වයස අවුරුදු 20ත් 30ත් අතර තරුණ තරුණියන් එන්නත් ලබාගැනීම සඳහා පවතින උනන්දුව අඩුවී ඇති බව රාජ්‍ය අමාත්‍ය, මහාචාර්ය චන්න ජයසුමන මහතා පවසයි.

ඔහු පෙන්වා දෙන්නේ, කොවිඩ් මර්දන එන්නත් ලබාගැනීමෙන් ලිංගික ශක්තිය හීනවන බවට සමාජ මාධ්‍ය ඔස්සේ පැතිර ගිය කරුණු හේතුවෙන් තරුණ තරුණියන් තුළ එන්නත් ලබාගැනීමට තිබූ උනන්දුව අඩුවී ඇති බවය.

ඒ පිළිබඳව වැඩිදුරටත් අදහස් දැක්වූ ඖෂධ නිෂ්පාදනය සැපයීම සහ නියාමන රාජ්‍ය අමාත්‍ය, මහාචාර්ය චන්න ජයසුමන මහතා,

“ඇතැම් ප්‍රදේශවල තරුණ තරුණියන්ගේ එන්නත් ලබාගැනීමේ අඩුවක් දක්නට ලැබෙනවා. එක හේතුවක් හැටියට දැනට අපිට පෙනී ගිහින් තියෙන්නේ සමාජ මාධ්‍ය ඔස්සේ යන ප්‍රචාර. කොවිඩ් -19 රෝගයට එන්නත ලබාගැනීමෙන් ලිංගික ශක්තිය හීන වෙනවා, දරුවො හැදීමේ හැකියාව නැති වෙනවා.. කියලා. මේ ආකාරයේ විවිධ කතා තරුණ තරුණියන්ගේ ඔළුවලට වැටිලා තියෙනවා. මේ සම්බන්ධයෙන් ලෝකෙ කරලා තියෙන පරීක්ෂණ අපි හොයලා බැලුවා. කිසිම තැනකින් එහෙම වාර්තා වෙලා නෑ. ඒක සම්පූර්ණයෙන්ම ව්‍යාජ කරුණක්. ඒ වගේම නිශ්චිත වශයෙන්ම කියන්න පුළුවන් අවුරුදු 30ට වැඩි පිරිසට තව සතියක් ඇතුළත එන්නත්කරණය නිමා කරන්න පුළුවන් වෙනවා.”

“උසස් පෙළ සහ සාමාන්‍ය පෙළ සිසුන් සඳහා එන්නත් ලබාදිය යුතුයි කියන අදහස මතුවුණා. ඒ වගේම ප්‍රාථමික පන්තිවල ඉන්න ළමයිට එන්නත්කරණය අවශ්‍ය නෑ. මොකද මේ වෛරසයට ගොදුරුවීමේ ඉතාම අඩු ප්‍රවණතාවයක් කුඩා ළමුන්ගේ තියෙන්නේ. ඒ නිසා එම පන්තිවලින් එන්නත්කරණය ආරම්භ කරන්න පුළුවන් කියලා තවත් යෝජනාවක් ඇති වුණා. මේ සම්බන්ධයෙන් දීර්ඝව සාකච්ඡා කළා.  මේ ගැන කමිටුවක් පත්කරලා තියෙනවා. මේ සතියේ කමිටුවේ නිර්දේශ ලැබෙයි. ඒ වගේම පෙරපාසල් යන වයසේ දරුවන්ටත් යම්කිසි නිර්දේශයක් ලබාදෙන්න කියලා මේ කමිටුවෙන් ඉල්ලීමක් කළා.”

මේ අතර දැනට භාවිතයට ගන්නා ඇස්ට්‍රාසෙනෙකා, සයිනොෆාම්, ස්පුට්නික් V , ෆයිසර් සහ මොඩර්නා යන එන්නත්වල පළමු හා දෙවන මාත්‍රා ඊයේ (12) පුද්ගලයින් 72,177 දෙනෙකුට ලබාදී තිබේ.

කොවිඩ් මර්දන එන්නත්කරණ වැඩසටහන අද (13) දිනයේත් දිස්ත්‍රික්ක රැසකදී ක්‍රියාත්මක අතර වයස අවුරුදු 20ත් 29ත් අතර පසුවන්නන් එන්නත්කරණය ද ප්‍රදේශ රැසකදීම සිදුවේ.

වසංගත රෝග විද්‍යා අංශයේ වාර්තාවලට අනුව මේ වනවිට එන්නත් මාත්‍රා දෙකම ලබාගෙන ඇති පුද්ගලයින් සංඛ්‍යාව 01 කෝටි 5 ලක්ෂ 79,220කි.

මෙරටින් වාර්තා වන දෛනික කොවිඩ් ආසාදිතයින් සංඛ්‍යාව තවදුරටත් පහළ යමින් ඊයේ (12) වාර්තා වූයේ නව ආසාදිතයින් 2,642ක් පමණි.

ඉන් එක් අයෙකු විදේශයන්හි සිට පැමිණි පුද්ගලයෙක් වන අතර සෙසු සියලුදෙනා අලුත් අවුරුදු කොවිඩ් පොකුරෙන් හඳුනාගත් ආශ්‍රිතයින්ය.

ගෙවුණු පැය 24 තුළ මෙරටදී PCR පරීක්ෂණ 12,390ක් සහ රැපිඩ් ඇන්ටිජන් පරීක්ෂණ 3,218ක් සිදුකර තිබේ.

මේ වනවිට මෙරට සමස්ත කොවිඩ් ආසාදිතයින් සංඛ්‍යාව 485,922 දක්වා ඉහළ ගොස් තිබේ.

ප්‍රතිකාර සහ නිරෝධායන කාලසීමාව අවසන් කළ සංඛ්‍යාව 414,295කි.

ඒ අනුව පුද්ගලයින් 60,331ක් දෙනෙකු තවදුරටත් ප්‍රතිකාර ලබමින් සිටින බව සෞඛ්‍ය අංශ පවසති.

එමෙන්ම මෙරට සිදුවූ සමස්ත කොවිඩ් මරණ සංඛ්‍යාව 11,296ක් දක්වා ඉහළ ගොස් තිබේ.